Міжнародны фестываль этнакультурных традыцый "Кліч Палесся" пройдзе ў Гомельскай вобласці 23 жніўня.

        Міжнародны фестываль этнакультурных традыцый "Кліч Палесся" пройдзе 23 жніўня ў аграгарадку Ляскавічы Петрыкаўскага раёна Гомельшчыны. Сёлета ён упершыню набыў статус міжнароднага, паведамляе БЕЛТА. Для ўдзелу ў форуме запрошаны творчыя калектывы, майстры і рамеснікі з Расіі, Украіны, Малдовы. Традыцыйна тут будуць прадстаўлены і самадзейныя артысты, народныя ўмельцы беларускага Палесся. У праграме – канцэрты, выставы рамеснай і народнай творчасці, якія ў поўнай меры адлюстроўваюць своеасаблівасць і ўнікальнасць палескага краю. Пройдуць конкурс "Прыгажуня Палесся", фотавыстава "Знакамітыя палешукі", конкурс маладой сям'і і свята ручніка. Упершыню адбудзецца цырымонія ўручэння памятнага знака "Ганаровы паляшук", гашэнне паштовай маркі.