Беларусь выступае за стварэнне сапраўднай супольнасці бяспекі ў рэгіёне АБСЕ

Беларусь выступае за неабходнасць стварэння ў рэгіёне АБСЕ сапраўднай супольнасці бяспекі. На гэтым беларуская дэлегацыя акцэнтавала ўвагу падчас Штогадовай канферэнцыі АБСЕ па аглядзе праблем у галіне бяспекі, што праходзіць у Вене. 

У парадак дня канферэнцыі ўключаны пытанні супрацоўніцтва па фарміраванні супольнасці бяспекі ў працэсе "Хельсінкі +40", супрацьдзеянні транснацыянальным пагрозам і выклікам, прадухіленні канфліктаў і іх крызісным урэгуляванні.

Дэлегацыя Беларусі выступіла за актывізацыю намаганняў дзяржаў-удзельніц па аднаўленні дыялогу аб кантролі над узбраеннямі ў Еўропе, а таксама ўдасканаленні мер умацавання даверу і бяспекі.