Акадэмічны драматычны тэатр імя Якуба Коласа пачынае новы сезон.

          Акадэмічны драматычны тэатр імя Якуба Коласа пачынае новы 89-ы сезон, па традыцыі, легендарным спектаклем "Несцерка". У новым сезоне па запрашэнні мастацкага кіраўніка тэатра Валерыя Анісенкі ў Віцебск прыедуць лепшыя рэжысёры Беларусі і Расіі. “Мальера” на коласаўскай сцэне будзе ставіць заслужаны дзеяч мастацтваў Расіі Аляксандр Міхайлаў. А беларускі тэатр адправіў заяўкі на ўдзел у некалькіх фестывалях - "Славянскі вянок" у Маскве, "Варнянскае лета" ў Балгарыі, фестываль шэкспіраўскага тэатра ў Гданьску. Тэатр імя Якуба Коласа - адзіны нацыянальны калектыў у Беларусі, які працуе ў абласным цэнтры. Тэатр пачынае рыхтавацца да свайго 90-годдзя. Ёсць намер паставіць п'есу пра віцебскага князя Альгерда і сыграць гэты спектакль на беразе Заходняй Дзвіны.