VI Міжнародны кулінарны фестываль "Мотальскія прысмакі" пройдзе 10-11 жніўня ў Іванаўскім раёне. На гэты раз мерапрыемства прысвечана 1025-годдзю Хрышчэння Русі. Ідэя сумясціць свецкае і царкоўнае мерапрыемства належыць святарам раёна. У Моталі на сродкі прыхаджан і спонсараў доўгі час рэканструявалі Свята-Праабражэнскую царкву - помнік архітэктуры 19-га стагоддзя. На замену купалаў і ўнутранага ўбрання храма выдаткавана каля Br2 млрд. Цырымонію ўзнагароджання тых, хто ўнёс свой уклад у рамонт храма, вырашылі ўключыць у праграму фестывалю. Але кулінарная тэма на Мотальскім фестывалі не адыходзіць на другі план. Увазе гасцей будуць прадстаўлены шматлікія гандлёвыя рады з прадукцыяй ад мясцовых вытворцаў.