Лукашэнка заклікаў АБСЕ вярнуцца да сваіх прафесійных абавязкаў

Арганізацыі па бяспецы і супрацоўніцтве ў Еўропе неабходна вярнуцца да сваіх прафесійных абавязкаў. Аб гэтым Прэзідэнт Беларусі Аляксандр Лукашэнка заявіў на сустрэчы з генеральным сакратаром АБСЕ Ферыдунам Сінірліаглу, перадае БЕЛТА.

"Я прытрымліваюся пункту гледжання, што шматпалярны свет і разнастайнасць - гэта тое, што трэба сёння нашай планеце. У душы, я ўпэўнены, вы гэтага прынцыпу прытрымліваецеся. Вы - чалавек вопытны. У ваш час закладвалася гэта ідэя - супрацоўніцтва розных краін, супрацоўніцтва ўсіх і з усімі, дыялогу і размовы. Таму невыпадковы ваш прыезд на нашу канферэнцыю. Мы гэта вельмі цэнім, - сказаў Прэзідэнт. - Што датычыцца АБСЕ, павінен сказаць, што ў нас неадназначнае стаўленне да гэтай арганізацыі з-за вядомых вам прычын. Але, прафесійна абмяркоўваючы ролю АБСЕ, хацеў бы сказаць, што мы заўсёды будзем змагацца за тое, каб наша Арганізацыя па бяспецы і супрацоўніцтве ў Еўропе вярнулася да сваіх прафесійных абавязкаў і працавала ў напрамку бяспекі і супрацоўніцтва".

"У Еўропе не першы год ідзе вайна. Для АБСЕ гэта сур'ёзны выклік. Ніякай рэакцыі з боку гэтай арганізацыі. Можа быць, яна і ёсць, але я пра яе нічога не ведаю. А трэба было б, каб кіраўнікі дзяржаў - членаў АБСЕ аб гэтым ведалі", - звярнуў увагу беларускі лідар.

Аляксандр Лукашэнка звярнуў увагу, што АБСЕ скацілася на рэйкі нейкай крытыкі толькі ў адным напрамку і адных і тых жа дзяржаў. Напрыклад, АБСЕ накіроўвае на выбары, на час правядзення электаральнай кампаніі місію наглядальнікаў з загадзя падрыхтаванымі дакладамі. Для ўсіх відавочна, пра што скажа АБСЕ ў Расіі, Беларусі і пра што будзе гаварыць арганізацыя, сакратарыят АБСЕ ў адрас выбараў у заходніх краінах, канстатаваў Прэзідэнт.

Адзін з прыкладаў - выбары ў Кангрэс ЗША, дзе АБСЕ ўвогуле не прысутнічае, наглядальнікаў туды на парог не пусцілі. "Як нам да гэтага ставіцца? - задаўся пытаннем кіраўнік дзяржавы. - Мы ставімся спакойна".

"Яшчэ раз паўтару: арганізацыя павінна займацца бяспекай і супрацоўніцтвам у Еўропе. Падтрымліваць і наводзіць парадак у нашым агульным доме, еўрапейскім. Ну, амерыканцы так падумалі і вырашылі: калі мы не можам у сябе ў доме навесці парадак, навошта ехаць у нейкі іншы дом і за нейкімі пытаннямі назіраць", - сказаў беларускі лідар.

Аляксандр Лукашэнка звярнуў увагу на асаблівую ролю АБСЕ і папярэдзіў: "Мы вельмі не хочам, каб АБСЕ паўтарыла ўсе памылкі ААН". Прэзідэнт адзначыў, што ў АБСЕ працуе шмат прафесійных людзей, якія разумеюць, што адбываецца, і будуць дзейнічаць у правільным напрамку. "Сведчаннем гэтага з'яўляецца ваш прыезд у Беларусь і наведванне гэтай канферэнцыі. Гэта сур'ёзны сігнал іншым", - сказаў Аляксандр Лукашэнка, звяртаючыся да генеральнага сакратара АБСЕ.