Заява МЗС: мэта крывадушнай санкцыйнай палітыкі - эканамічна ўдушыць Беларусь, максімальна пагоршыць жыццё беларусаў

Міністэрства замежных спраў выступіла з заявай у сувязі з прыняццем ЕС чарговага пакета санкцый у адносінах да Беларусі, паведамляе БЕЛТА.

"Глыбіня абсурду як непасрэдна рашэння Еўрапейскага саюза аб чарговых санкцыях супраць суверэннай Беларусі, так і самога яго зместу ўжо з цяжкасцю паддаецца разуменню, - гаворыцца ў дакуменце. - Еўрачыноўнікі прыдумалі нейкую агрэсію з боку мірнай Беларусі і, нягледзячы на разважлівасць, прадастаўленыя факты, пачатыя тэхнічныя кансультацыі і дадатковыя меры па стрымліванні нелегальнай міграцыі, якія прымаюцца беларускім бокам, крывадушна нанеслі санкцыйны ўдар".

У заяве адзначаецца: "У дэструктыўных мэтах прадоўжана адкрытая дэманізацыя нашай краіны - увесь цяжар адказнасці ўскладаецца на Беларусь пры нахабным ігнараванні сапраўдных прычын глабальнага міграцыйнага крызісу. Мэта ўсёй гэтай палітыкі - эканамічна ўдушыць Беларусь, максімальна ўскладніць і пагоршыць жыццё беларусаў. Высакамоўнае глупства, якое гучыць з еўрапейскіх трыбун, у дадзеным выпадку не мае да рэальнасці ніякіх адносін".

"Фармальна абапіраючыся на безадказныя мантры аб узмацненні націску, ЕС па-ранейшаму застаецца глухім да зваротаў мільёнаў беларускіх працоўных, якія патрабуюць адмены гэтых варварскіх і антыгуманных мер, - звярнулі ўвагу ў МЗС Беларусі. - На гэтым шляху Еўрасаюзу не важна, што пацерпяць дзясяткі тысяч беларускіх грамадзян і членаў іх сем'яў, еўрапейскія спажыўцы, пастаўшчыкі, бізнесмены і кампаніі. Такія "дробязі" для іх нічога не значаць, калі хочацца пагуляць у геапалітыку або задаволіць прагматычныя дзелавыя інтарэсы пэўных еўрапейскіх колаў. Менавіта таму ў пакет уключаны беларускія прадпрыемствы, якія не маюць ніякіх адносін да міграцыйнага крызісу. За гэтым хаваецца жаданне пазбавіцца ад канкурэнтаў".

"Відавочна, што гэты прэсінг будзе прадоўжаны ў сляпой лютасці ад адсутнасці выніку. У гэтым выпадку вынік для еўрапалітыкаў - знішчэнне Беларусі як суверэннай, эканамічна паспяховай дзяржавы. Беларусь не першы раз сутыкаецца з такімі выклікамі з боку Захаду. Як і раней, беларуская дзяржава памацнее, пройдзе гэты этап годна і абароніць адпаведны ўзровень жыцця свайго насельніцтва", - гаворыцца ў заяве беларускага знешнепалітычнага ведамства.

Згубнасць і бесперспектыўнасць санкцый даўно відавочна для ўсіх разважлівых людзей, гэтак жа, як і іх негатыўнае ўздзеянне на абодва бакі. "Разам з тым выключна ў якасці адказу намі, як і заяўлялася раней, будуць прыняты жорсткія, асіметрычныя, але адэкватныя меры", - адзначаецца ў дакуменце.

"Чым далей будзе прадаўжацца гэты працэс, тым больш відавочна становіцца яго небяспека ўжо для стабільнасці і бяспекі ўсяго нашага рэгіёна, - лічаць у Міністэрстве замежных спраў Беларусі. - І віна за ўсё ляжыць выключна на ініцыятары санкцыйнай спіралі і агрэсіі - Еўрапейскім саюзе".

"Мы ўсё яшчэ заклікаем еўрапейскіх палітыкаў абдумацца", - гаворыцца ў заяве МЗС.