Сямашка расказаў пра планы па пашырэнні геаграфіі палётаў "Белавія"

Фота: belta.by

Пасол Беларусі ў Расіі Уладзімір Сямашка ў інтэрв'ю агенцтву "РІА Навіны" расказаў пра планы пашырэння геаграфіі палётаў авіякампаніі "Белавія", паведамляе БЕЛТА.

Дыпламат адзначыў: ва ўмовах дзеючых абмежаванняў на палёты ў краіны ЕС і Украіну ў адносінах да беларускага авіяперавозчыка "Белавія" задача пашырэння геаграфіі палётаў мае прыярытэтны характар. "Авіякампанія "Белавія" павялічыла ўжо частату палётаў у Стамбул, Тбілісі і Батумі, а таксама колькасць чартарных рэйсаў у Егіпет і Турцыю. Прапрацоўваецца пытанне павелічэння колькасці рэйсаў у Казахстан, - сказаў ён. - Каб забяспечыць патрэбы людзей, нам неабходна таксама актыўна прыцягваць замежных авіяперавозчыкаў да выканання палётаў у Нацыянальны аэрапорт Мінск. Вядзецца такая работа з Аб'яднанымі Арабскімі Эміратамі, Сербіяй, Азербайджанам, Катарам", - сказаў Уладзімір Сямашка.

Паводле яго слоў, у бліжэйшы час чакаецца адкрыццё рэгулярных рэйсаў кыргызскай авіякампаніі па маршруце Бішкек - Мінск - Бішкек. "Безумоўна, мы зацікаўлены ў павелічэнні аб'ёмаў авіязносін з Расійскай Федэрацыяй, - падкрэсліў Уладзімір Сямашка. - Актыўна абмяркоўваем варыянты павелічэння колькасці рэйсаў з Беларусі ў расійскія гарады. Авіякампанія "Белавія" прапрацоўвае адкрыццё рэгулярных рэйсаў у Мінеральныя Воды і Анапу, аднаўленне палётаў у Сочы і Краснадар. Дадам, што шэраг расійскіх авіякампаній таксама павялічылі колькасць сваіх рэйсаў у Беларусь. Так, з 10 чэрвеня "Аэрафлот" павялічыў частату палётаў з Масквы ў Мінск з пяці да 10 рэйсаў на тыдзень; "ЮТэйр" павялічыў колькасць рэйсаў у Мінск да трох на тыдзень (з Самары, Санкт-Пецярбурга, Калінінграда); авіякампанія Nord Wind выконвае рэйсы з Калінінграда ў Мінск два разы на тыдзень".

"Разлічваем на хутчэйшае станоўчае вырашэнне пытання аб адкрыцці названых авіярэйсаў з Беларусі ў Расію аператыўным штабам урада Расійскай Федэрацыі (па папярэджанні завозу і распаўсюджвання новай каранавіруснай інфекцыі на тэрыторыі Расіі. - Заўвага БЕЛТА)", - падкрэсліў пасол. Ён таксама выказаў надзею, што расійскі бок у духу саюзніцкіх адносін акажа падтрымку ў няпростай сітуацыі, што склалася для нацыянальнага авіяперавозчыка "Белавія" ва ўмовах палітычнага і эканамічнага націску на Беларусь з боку еўрапейскіх краін.

Закранаючы расследаванне інцыдэнту з вымушанай пасадкай у Мінску самалёта ірландскай авіякампаніі Ryanair, Уладзімір Сямашка нагадаў, што яно прадоўжана да верасня. "Беларусь прадаставіла ўсе неабходныя матэрыялы, праявіла поўную транспарэнтнасць і дэталёва адказала на ўсе пытанні, - заявіў ён. - Мы нічога не ўтойваем. Партнёры ж з іншых краін, ды і кіраўніцтва самой авіякампаніі аддаюць перавагу трымацца пазіцыі закрытасці, пазбягаюць адказваць на нязручныя пытанні. Такім чынам, пачакаем рашэння спецыяльна створанай ІКАО камісіі па расследаванні гэтага інцыдэнту. Беларусь разлічвае на справядлівае і аб'ектыўнае расследаванне".

Гаворачы аб існуючых абмежаваннях на ўезд у Расію аўтатранспартам для беларусаў і на выезд з Расіі расійскіх грамадзян, пасол канстатаваў, што за апошні час зрухаў у іх зняцці не адбылося. "Аднак хачу нагадаць, што Беларусь не ўводзіла абмежаванняў на перамяшчэнне для расіян праз беларуска-расійскі ўчастак граніцы, у тым ліку і пры ўездзе іх праз міжнародныя пункты пропуску (з Літвой, Латвіяй, Польшчай і Украінай), - адзначыў дыпламат. - Бягучая сітуацыя поўнасцю залежыць ад адпаведных рашэнняў расійскага боку".

"Наконт аўтамабільных зносін пазіцыя беларускага боку заключаецца ў тым, каб зняць існуючыя абмежаванні, забяспечыўшы пры гэтым належны эпідэміялагічны кантроль. Можна прымяніць для гэтага меры прафілактыкі і кантролю, уведзеныя для пасажыраў, якія едуць авія- і чыгуначным транспартам. Напрыклад, дазволіць уязджаць асобам з адмоўным ПЛР-тэстам, а таксама тым, хто вакцынаваны або перахварэў ужо і мае дакументальнае пацвярджэнне. Пытанне адкрытае. Мы гатовы да далейшых дзеянняў і вельмі чакаем адпаведных крокаў ад расійскага боку", - рэзюмаваў Уладзімір Сямашка.