Беларусь і Расія выбудоўваюць новую мадэль адносін у адзінай эканамічнай прасторы

Фота: belta.by

Беларусь і Расія выбудоўваюць новую мадэль адносін у рамках адзінай эканамічнай прасторы. Але пры гэтым размова ні ў якім разе не ідзе аб шкодзе палітычнаму або эканамічнаму суверэнітэту. Гэта адзначыў прэм'ер-міністр Раман Галоўчанка па выніках праведзенай у Прэзідэнта Беларусі Аляксандра Лукашэнкі нарады, паведамляе карэспандэнт БЕЛТА.

Раман Галоўчанка расказаў, што "былі разгледжаны два вялікія блокі пытанняў: па эканамічнай інтэграцыі Беларусі і Расіі, па забеспячэнні ўстойлівай работы эканомікі ва ўмовах як эканамічных санкцый з боку Захаду, так і агучаных пагроз увядзення дадатковых санкцый у адносінах да суб'ектаў гаспадарання Беларусі і некаторых фізічных асоб".

"Што датычыцца інтэграцыйнай работы, урад праінфармаваў аб фактычных выніках кантактаў з расійскімі калегамі, выніках перагаворнай работы, якая пайшла ў актыўнае жыццё, напэўна, з восені мінулага года, - прадоўжыў Раман Галоўчанка. - І цяпер фактычна мы выходзім на фінішную па ўзгадненні ўсіх саюзных праграм, якія ахопліваюць пабудову адзінай эканамічнай прасторы дзвюх краін для таго, каб забяспечыць роўныя ўмовы работы суб'ектаў гаспадарання Беларусі і Расіі. У цэлым гэтыя падыходы падтрыманы, і нам засталося дашліфаваць няшмат пытанняў з тым, каб на працягу лета, не пазней за лета завяршыць усю работу і ўнесці кіраўнікам дзяржаў падрыхтаваныя рашэнні наконт гэтага".

"Яшчэ раз паўтару, каб зняць нейкія там інсінуацыі, мы сёння аб гэтым гаварылі: у прынцыпе не ідзе размова аб нейкай шкодзе палітычнаму або эканамічнаму суверэнітэту Рэспублікі Беларусь, звярнуў увагу кіраўнік беларускага ўрада. - Мы выбудоўваем новую мадэль адносін, выбудоўваем яе ў рамках адзінай эканамічнай прасторы для таго, каб не проста стварыць роўныя ўмовы, а для таго, каб у прынцыпе стварыць нейкія новыя мадэлі эканомікі з тым, каб яны развіваліся даволі сінхронна. Паколькі мы знаходзімся ў Саюзнай дзяржаве, мы цесна пераплецены, і эканамічныя мадэлі, і канцэпцыя развіцця эканомікі павінны быць падобнымі", - рэзюмаваў ён.