Удзельнікі кантактнай групы па Украіне дасягнулі дамоўленасцей па асноўных пытаннях, што абмяркоўваліся.

      Удзельнікі трохбаковай кантактнай групы (Украіна-АБСЕ-Расія) па ўрэгуляванні сітуацыі на ўсходзе Украіны на сустрэчы ў Мінску з прадстаўнікамі кіраўніцтва самаабвешчанай Данецкай народнай рэспублікі дасягнулі дамоўленасці па двух асноўных пытаннях, што абмяркоўваліся. Прынята рашэнне аб гарантаванні бяспечнага доступу міжнародных экспертаў да месца крушэння "Боінга" і неадкладным вызваленні пэўнай колькасці асоб, узятых у палон. Акрамя таго, на думку экспертаў, неабходна ўстанавіць падтрымліваемы АБСЕ механізм маніторынгу, які павінен уступіць у сілу з пачаткам перамір'я, і эфектыўны кантроль і верыфікацыю граніцы паміж Украінай і Расіяй. Удзельнікі дамовіліся, што чарговая іх сустрэча адбудзецца на наступным тыдні. З ініцыятывай наконт правядзення ў Беларусі перагавораў па вырашэнні ўкраінскага крызісу да кіраўніка беларускай дзяржавы Аляксандра Лукашэнкі раней звярнуўся Прэзідэнт Украіны Пётр Парашэнка.