Унікальную аперацыю дзіцяці з прыроджанай паталогіяй пазваночніка правялі ў Мінску

Фота belta.by

У РНПЦ траўматалогіі і артапедыі правялі ўнікальную аперацыю дзіцяці з прыроджанай паталогіяй пазваночніка.

Ля аперацыйнага стала працавалі хірургі дзвюх краін - Беларусі і Расіі. Аперыравалі пяцігадовага хлопчыка. Малыш нарадзіўся з анамаліяй, якая перашкаджае развівацца пазваночніку і стварае канфлікт для спіннога мозга. Аперацыя стала магчымай дзякуючы дружалюбным адносінам беларускіх і расійскіх урачоў і дзяржаўнай праграме Саюзнай дзяржавы "Спінальныя сістэмы".

Паводле слоў дырэктара РНПЦ траўматалогіі і артапедыі доктара медыцынскіх навук прафесара Міхаіла Герасіменкі, аперацыя прайшла паспяхова. Хлопчыка перавялі ў рэанімацыю, дзе ён будзе знаходзіцца некалькі дзён. Чакаецца, што прыкладна праз тыдзень ён устане на ногі. "Далей здымаем швы і адпускаем дзіця дамоў. Пацыент некалькі месяцаў будзе насіць спецыяльны гарсэт, а ўжо праз паўгода-год зможа весці нармальнае жыццё. Праўда, першы час ёсць пэўныя абмежаванні: яму нельга бегаць, скакаць, займацца рухавымі відамі спорту. Але калі ўсё зрасцецца, абмежаванні па фізічных актыўнасцях будуць мінімальныя", - расказаў дырэктар цэнтра.

Доктар медыцынскіх навук прафесар член-карэспандэнт Расійскай акадэміі навук дырэктар НМДЦ дзіцячай траўматалогіі і артапедыі імя Г.І.Турнера Сяргей Вісарыёнаў паведаміў, што ў дзіцяці была выяўленая кіфатычная дэфармацыя пазваночніка прыроджанага характару. Яна сфарміравалася на фоне анамальнага задняга клінападобнага пазванка, які стварае дэфармацыю ў бакавой праекцыі пазваночніка. Аб'ём хірургічнага ўмяшання заключаўся ў пастаноўцы распрацаваных беларускімі і расійскімі спецыялістамі ўнікальных металаканструкцый. Гэта дае магчымасць выправіць дэфармацыю пазваночніка і стварыць у далейшым спрыяльныя ўмовы для развіцця дзіцяці.

Сяргей Вісарыёнаў растлумачыў: у выпадку неўмяшання дэфармацыя будзе прагрэсіраваць. "Яна будзе дасягаць вельмі вялікай велічыні і рана ці позна настане канфлікт са спінным мозгам, дзіця перастане хадзіць і застанецца інвалідам на ўсё астатняе жыццё. Выкананае раней хірургічнае ўмяшанне дае магчымасць цалкам выправіць прыроджаную дэфармацыю і стварыць спрыяльныя ўмовы для далейшага развіцця дзіцяці", - сказаў ён.

Дырэктар цэнтра дзіцячай траўматалогіі і артапедыі імя Г.І.Турнера заўважыў, што сённяшняя аперацыя - яшчэ адзін доказ эфектыўнай сумеснай работы беларускіх і расійскіх калег па праграме Саюзнай дзяржавы "Спінальныя сістэмы". "РНПЦ траўматалогіі і артапедыі мае вялікую гісторыю і вопыт лячэння пацыентаў з траўмамі пазваночніка. Наша ўстанова мае вялікі вопыт і велізарныя рэзультаты лячэння дзяцей з прыроджанымі дэфармацыямі пазваночніка. У выніку нашага сумеснага супрацоўніцтва, нашай работы і нарадзілася ідэя стварэння саюзнай праграмы", - адзначыў ён.

Паводле слоў Сяргея Вісарыёнава, колькасць выпадкаў прыроджаных дэфармацый пазваночніка ў дзяцей вельмі вялікая: у Расіі больш за 63 тыс. дзяцей маюць такія дэфармацыі, у Беларусі - больш за 1,5 тыс. Амаль палавіна з іх маюць патрэбу ў хірургічным лячэнні ў раннім узросце, гэта значыць да трох гадоў. "Ранняе выяўленне прыроджаных анамалій, уласна кажучы, таксама адна з ідэалогій нашай саюзнай праграмы, - адзначыў Сяргей Вісарыёнаў. - Мы стварылі ўнікальную дыягнастычную платформу, заснаваную на малекулярна-генетычных і біяхімічных крытэрыях. Выяўляючы адпаведныя маркеры, мы можам загадзя сказаць, ці будзе дэфармацыя ў дзіцяці прагрэсіраваць або яна застанецца стабільнай на працягу жыцця. Калі разумеем, што яна будзе прагрэсіраваць, адразу ж рэкамендуем ранняе хірургічнае лячэнне".

Дырэктар расійскага цэнтра растлумачыў, што ўнікальнасць хірургічных распрацовак у тым, што ў раннім узросце праводзіцца адзіная аперацыя, якая дае магчымасць цалкам выправіць прыроджаную дэфармацыю і стварыць спрыяльныя ўмовы для росту і развіцця пазваночніка ў працэсе жыцця. "Гэта адзіная аперацыя, якая дазваляе вырашыць усе праблемы ў дзіцяці, звязаныя з прыроджанай дэфармацыяй пазваночніка", - сказаў ён.

Паводле слоў Міхаіла Герасіменкі, праграма Саюзнай дзяржавы - толькі асобны фрагмент доўгатэрміновага беларуска-расійскага супрацоўніцтва. "У нас рэгулярна адбываюцца абмены дактарамі. Мы аперыруем у інстытуце імя Турнера, вядучыя спецыялісты гэтага інстытута прыязджаюць да нас. Гэта абмен вопытам непасрэдна ў аперацыйнай. Мы таксама праводзім круглыя сталы з дапамогай відэа-канферэнц-сувязі. Удзельнічаем у кангрэсах, канферэнцыях, праводзім сумесныя навуковыя работы. Таму супрацоўніцтва з інстытутам Турнера і іншымі ўстановамі Расіі ў нас даволі актыўнае, паўнацэннае і напоўненае навуковым зместам", - заўважыў ён.

Што датычыцца ў цэлым работы беларускага РНПЦ, яго дырэктар адзначыў, што цэнтр выконвае свае функцыі ў поўным аб'ёме. Ідзе планавая работа не толькі па дзіцячай артапедыі, але і пратэзаванні, нейрахірургічных умяшаннях. Дапамога беларускім і замежным грамадзянам аказваецца ў поўным аб'ёме. А выкананне праграмы "Спінальныя сістэмы" нясе ў сабе не толькі стапрацэнтную навуковую навізну ў сусветным маштабе, але і стапрацэнтнае імпартазамяшчэнне. Распрацаваную металаканструкцыю і адпаведныя методыкі плануюць укараніць у рэгіёнах Беларусі.