Фота: belta.by

Федэральная служба па ветэрынарным і фітасанітарным наглядзе РФ здымае абмежаванні на пастаўкі прадукцыі з трох беларускіх мясакамбінатаў. Такое рашэнне прынята па выніках перагавораў кіраўніка Рассельгаснагляду Сяргея Данкверта і намесніка прэм'ер-міністра Беларусі Аляксандра Субоціна, паведамляе БЕЛТА са спасылкай на сайт расійскага ведамства.

"Бакі абмеркавалі пытанні бягучага супрацоўніцтва, якія ў тым ліку датычацца паставак беларускай прадукцыі на расійскі рынак. Па выніках перагавораў, а таксама з улікам гарантыі Дэпартамента ветэрынарнага і харчовага нагляду Мінсельгасхарча Беларусі прынята рашэнне аб адмене з 11 снежня 2020 года часовых абмежаванняў на пастаўкі ў Расію асобных відаў жывёлагадоўчай прадукцыі з трох беларускіх прадпрыемстваў", - гаворыцца ў паведамленні.

Дазваляюцца пастаўкі прадукцыі Глыбоцкага і Жлобінскага мясакамбінатаў, за выключэннем ялавічыны на костцы і прадукцыі, якая мае рызыку распаўсюджвання афрыканскай чумы свіней. З Магілёўскага мясакамбіната здымаюцца абмежаванні на пастаўкі тэрмаапрацаванай гатовай прадукцыі са свініны (акрамя прадукцыі, якая мае рызыку распаўсюджвання АЧС).