Ва Украіне з’явіцца помнік Яну Баршчэўскаму – знакамітаму аўтару «Шляхціца Завальні» (аўдыя)

Бюст Яна Баршчэўскага, які неўзабаве будзе ўсталяваны ў Чуднаве (фота: svaboda.org)

Помнік знакамітаму пісьменніку Яну Баршчэўскаму будзе адкрыты ва ўкраінскім Чуднаве ўжо 12 верасня. Урачыстасць прымеркавана да Дня горада і стане адной з цэнтральных падзей.

Сёння творчую спадчыну пісьменніка лічаць сваёй у некалькіх краінах. Баршчэўскі нарадзіўся ў Беларусі – на тэрыторыі сучаснага Расонскага раёна Віцебскай вобласці ў канцы XVIII стагоддзя. Яго называюць стваральнікам новай беларускай літаратуры, а самы вядомы твор – празаічны зборнік «Шляхціц Завальня, або Беларусь у фантастычных апавяданнях» – напісаны па-польску. Біяграфія Баршчэўскага звязана таксама з Санкт-Пецярбургам, дзе ён выкладаў мовы, вывучаў літаратуру, вёў актыўнае творчае жыццё. Апошнія гады жыцця пісьменнік знаходзіўся на тэрыторыі Украіны, у горадзе Чуднаве.

       Ян Баршчэўскі, 1826 г. (фота: be.wikipedia.org)

Менавіта ў Чуднаве год таму выпадкова знайшлі надмагільную пліту Яна Баршчэўскага. Міжнароднае радыё «Беларусь» падрабязна распавядала гэту гісторыю.

Рэалізоўвае праект па ўвекавечанні памяці аб выбітным творцы дабрачынны фонд імя Марыі Магдалены Радзівіл у Швейцарыі пры падтрымцы шматлікіх партнёрскіх арганізацый і неабыякавых людзей у розных краінах.

Надпіс на помніку Яну Баршчэўскаму ў г. Чуднаў (фота: Алесь Сапега)

Помнік будзе мець надпіс на трох мовах – беларускай, украінскай і польскай. Сёння ўжо адліты бюст і інфармацыйная дошка, зроблены гранітны слуп. Усё гэта перададзена мясцовым уладам горада Чуднава. Пра апошнія навіны міжнароднае радыё «Беларусь» распытала ініцыятара праекта, прэзідэнта дабрачыннага фонду імя Марыі Магдалены Радзівіл у Швейцарыі Алеся Сапегу:

Вікторыя Пяткевіч